رشّة ملح في التسبيكة، فلفل اسود على البشاميل، شوية قرفة مع بهارات اللحمة؛ كلها تكّات تظبط الطبخة ومابنستغربش من إضافتها. لكن ممكن نفكر مرّتين قبل ما نختار بسكويت بالحبهان، أو قبل ما نضيف قرفة على الرز بلبن، أو ناكل شوكولاتة بطعم الشطّة! كل مطبخ فيه توابل ماينفعش نستغنى عنها في أي طبخة، وتوابل تانية بتكون بطلة أطباق معيّنة. خلونا نتعرف علي أشهر 6 توابل بنستخدمها في الأكلات الحادقة والحلوة وبتدي للأكل طعم تاني.
أصل وتاريخ البهارات
سنة 3500 قبل الميلاد قدماء المصريين استخدموا التوابل في الأكل ومستحضرات التجميل وغيرها، والعرب عرفوا التوابل من خلال التجارة اللي بينهم وبين دول مختلفةـ، لحد ما سكان أوروبا اكتشفوا الهند وبقت أشهر بقعة في العالم كمصدر للتوابل والأعشاب العطرية لكل البلاد. في الوقت ده، كانت تجارة التوابل وقيمتها وسعرها زي تجارة الدهب النهاردة.
١- القرفة
القرفة من أشهر التوابل المستخدمة في المطبخ؛ لأنها بتضيف نكهة وريحة مميزة جداً للأكل، وطعمها بيجمع بين الدفء والحلاوة والحدّة في نفس الوقت. القرفة غنيّة بمضادات الأكسدة وبتساعد عليتقوية المناعة وفقدان الوزن وزيادة معدل الحرق. في المطبخ، القرفة بتستخدم في تتبيل اللحوم والفراخ لأنها بتقضي على أي ريحة زفارة محتملة في الأكل، وفي بعض الوصفات زي الرز بالخلطة بتضيف له لون دهبي ونكهة مميزة. أما في الحلو، القرفة بتستخدم في أصناف حلويات كتيرة من أشهرها كيك وبسكويت القرفة، الجلاش بالقرفة والزبيب، السينابون رول بالقرفة، الدانش بالمربى والقرفة، وكمان رشّة القرفة على وش الرز بلبن.
٢- الزنجبيل
الزنجبيل معروف بفوايده الطبيّة والعلاجية زيّ كونه مسكّن للآلام المختلفة وقدرته على خفض ضغط الدم والمساعدة في تقليل مخاطر الإصابة بأمراض القلب، ومحاربته للإلتهابات زي التهاب اللثة. في الأكل بنلاقي الزنجبيل عنصر مهم في عدد كبير من الأطباق الأسيوية زي السوشي، وده لكونه اكتُشف لأول مرّة في التاريخ في بلاد جنوب شرق آسيا اللي استخدموه في وصفاتهم. أما في الحلويات بيستخدم الزنجبيل في أنواع كتيرة من الكوكيز والبسكويت المتنوّعة وكمان في الكيك لأنه بيضيف نكهة حارة خفيفة مع الطعم الحلو بتكون مميزة، وفي أغلب الوصفات بنلاقي وجود الزنجبيل مرتبط بوجود القرفة. جربوا كيكة القرفة والزنجبيل من بريدفاست وقولولنا رأيكم!
٣- الحبهان
مفيش أكتر من استخدامات الحبهان في المطبخ. في الشوربة الحبهان بيضاف عشان يدّي نكهة ويمنع أي ريحة غير مرغوبة؛ عشان كدة دايماً بنلاقيه في شوربة الفراخ والخضار ولسان العصفور. في الوطن العربي وتحديداً دول الخليج، الحبهان بيستخدم في تحضير القهوة وتحويجها. أمّا في الحلويات فالحبهان الكامل والمطحون بيستخدم في تنكيه المهلبية والرز بلبن، ده غير الحلويات الشرقية زيّ البقلاوة والجلّاش بأنواعهم المختلفة.
٤- اليانسون
اليانسون مشهور بكونه المشروب اللي بيساعد على تهدئة الأعصاب وتهدئة الكحة. اليانسون فوايده الصحية كتيرة من ضمنها إنه فاتح للشهية وبيعزز من صحة الجهاز الهضمي والجهاز التنفسي. أما في وصفات الحلويات، فأشهر استخداماته بسكويت اليانسون وكيك اليانسون.
٥- المستكة
المستكة في الأصل مادة صمغية بيتم استخراجها من الشجر 3 مرات في السنة، بيتم زراعتها في دول حوض البحر المتوسط ومنشأها الأصلي اليونان، ولها فوايد كتيرة زي الحفاظ على صحة الأسنان واللثة.المستكة موجودة في أكلات حلوة وحادقة كتير، خصوصاً في الوصفات الشامية زي الفتة والشاورما وكتير من وصفات الفراخ واللحمة، بالإضافة لآيس كريم المستكة، الرز بلبن، الكيك، وفي المطبخ التركي بنلاقي المستكة في أنواع متنوّعة من الفطاير والملبن وغيره من الحلويات التركية المميّزة.
٦- الشطّة
الشطّة بتيجي في أشكال كتير: ثمار، رقائق، أو مطحونة. أشهر استخدام للشطّة في المطبخ هي انها بتخلّي الأكل حار، وده طبعاً في الطبخات الحادقة زيّ الكشري، أما في الحلو، فالشطّة بتضيف طعم مميّز جداً لمّا بتتمزج مع مكوّنات وعناصر معيّنة زيّ الشوكولاتة اللي بتديها نكهة أعمق وبتبرز طعم الكاكاو فيها. جرّبوا الشوكولاتة بالشطّة وهتعرفوا قد إيه هي فارقة في الطعم.
بعد ما تعرفنا على أشهر توابل الحلو والحادق، حابين نقولكم إن بريدفاست عمل لكم تشكيلة توابل وبهارات جديدة عشان تضيف نكهة لذيذة لكل أكلاتكم. مجموعة توابل بريدفاست فيها التوابل والبهارات الأساسية اللي بتحتاجها في مطبخك زي الفلفل الأسود، البابريكا، ملح الهيمالايا، الزعتر، القرفة، الحبهان، والتوابل الإيطالية وغيرها. اطلب توابل بريدفاست من هنا توصلك في دقايق لحد باب البيت. استمتع بخصم 15% على أول أوردر من تطبيق بريدفاست. استخدم كود BLC15. العرض ساري حتى 19 أكتوبر. اطلب دلوقتي وهنوصلك في دقايق.
