الزيارة الأسبوعية أو الشهرية للسوبرماركت، أو حتى التسوّق أونلاين أحيانا بياخد وقت لتحديد كل احتياجات البيت المطلوب شرائها. ساعات رغم وجود قائمة بالطلبات إلّا اننا بننسى أساسيات ونضطر نطلب للمرّة التانية أو ننزل تاني عشان نلم باقي البقالة. في المقال ده هنقول لكم شوية طرق هتساعدكم تفتكروا كل طلباتكوا وتقللوا فرص النسيان.
1- طريقة ترتيب المحل
لو بتشتري البقالة كل مرة من نفس المكان، يبقى أكيد سهل تحفظ ترتيب الأقسام، وبالتالي ممكن تكتب الطلبات بالطريقة دي. مثلا، لو أول حاجة في مدخل السوبرماركت هي الخضروات والفاكهة يبقى دي تكون في أول القايمة، بعدها المخبوزات والمجمدات أو أيا كان الترتيب. ولو بتشتري من تطبيق معيّن أونلاين يبقى أفضل حاجة إنك تمشي بترتيب ال icons أو الأقسام اللي موجودة؛ وبكده مفيش قسم هيفوتك غير وانت متأكد انك جبت احتياجاتك منه.
2- طريقة التسوّق حسب المكونات
لو انت محتاج تشتري مكونات وصفة معينة أو أكلات الأسبوع كله يبقى هيساعدك جدا انك تكتب المكونات اللي محتاجها لكل وصفة وتشوف اللي ناقصك منها. يعني لو هتخبز كيكة يبقى محتاج تراجع الخزين اللي عندك من دقيق، زبدة وزيت، بيكينج بودر، لبن، بيض، كاكاو أو أي طعم هتضيفه للكيك وكمان مواد التزيين. بالإضافة لكده مقادير أكلاتك الأساسية.
3- طريقة تفضيلات أفراد الأسرة
ودي طريقة مفيدة جدا لو معانا في البيت أطفال أو كبار سن أو حد له احتياجات غذائية مختلفة زي الحساسيات مثلا. في الحالة دي ممكن نبدأ نقسّم المشتريات حسب كل فرد؛ مين محتاج أكل صحي وبدائل سكر، مين محتاج سناكس أو وجبات أطفال أو حفاضات، مين عنده حساسية من المكسرات أو اللبن وكده. وبالطريقة دي نضمن اننا نشتري طلبات كل حد في البيت.
في النهاية، كل بيت له الطريقة الأنسب لتحضير قايمة البقالة سواء هنشتريها أونلاين أو هنروح نجيبها بنفسنا، المهم إننا ماننساش أي حاجة من احتياجات بيتنا ومانجبش طلبات متكررة أو زيادة عن اللزوم.
